Rom 10 | BDD | STEP | Ma 'iyagwao, moisa 'igu bodaowedi yanuwanuwa tuhuyahidi madouna togidega ma 'etolema siloba, ee 'oinega tuta mabwaiyana weyahidi ya'ahwa'ahwanoi waiwai Yehoba 'oina.

Romans 10

1 Ma 'iyagwao, moisa 'igu bodaowedi yanuwanuwa tuhuyahidi madouna togidega ma 'etolema siloba, ee 'oinega tuta mabwaiyana weyahidi ya'ahwa'ahwanoi waiwai Yehoba 'oina. 2 Ta yasanapu bwaibwainidiya Yehoba weyahina sihematamatana madouna, ma hesiyage geya 'ana 'eda moisa 'oinega sida tauya. 3 Cedaina sihemata hwadiyeya, 'oinega siboidimo 'idi nuwatuhu simuliyediya ma 'abehega 'oidiyega Yehoba 'i'ahwa dumwaluwedi, ta si'aipate 'asaya, weyahina Yehoba 'ina nuwatuhuina 'adi 'ahwadumwalu weyahina geya sihemise. 4 Ma Keliso 'ina paihowega Mosese 'ina loina 'oidega 'igumwala, eeta bewa tutaina tauna 'ina loina 'ihegaineya ma 'eguma taiya Kelisoina 'ihemisae, nata Yehoba 'i'ahwa dumwaluwe.

Yehoba 'ina 'etolema mabwaiyada weyahida.

5 Bewa gide Mosese 'igwae 'esa 'ada 'ahwadumwalu weyahina ma 'ilelediya, 'igwaeya,

“Ceguma taiya loina mabwaiyana 'imuliyedi, nata yawasi bwebwe'ana 'iloba, bewa tutaina ma wete tuta 'inaonaoma 'oidiya.”
6 Ma bewa tutaina tauda 'ida hemisa 'abehega Yehoba tauna 'i'abi 'ehaugita, ma tauna weyahina Yehoba 'ina Buki 'oina 'ihepwaila, 'igwaeya, “Geya sowana 'eta taiya 'oimiyega 'inuwatuhu ma 'igwae, ‘Taiya nata 'ihane Galewa?’” Bewa gwaeina 'ana sanapu 'abehega, “Taiya nata Keliso 'itoeyama.”

7 “Ta wete geya sowana 'eta 'oimiyega 'igwae, ‘Taiya nata 'idobi bale'u dudunina?’” Gwae bewa 'ana sanapu 'abehega “Taiya nata Keliso 'amasega 'i'abihetoholo hileyama?”

8 Ma he'ita moisa Yehoba 'ina Buki 'oina bewa gide,

“Gwaeina deimiya tuwa 'imiyamiya beno 'ahwamiya ma wete 'atemiya.”
Gwaeinaina beno hemisa weyahina 'alologuguyae 'oimiya, 9 ma 'abehega Yehoba 'i'etolemegita 'eguma 'ahwadega tatagwatagwala ma tagwae, “Yesu 'owa 'igu Bada”, ma 'atedega tahemisae 'abehega Yehoba Yesu 'i'abihe toholohileya 'amasega. 10 Weyahina 'atedega tahemiseya eeta Yehoba 'i'ahwa dumwaluwegita. Ta wete tahetohepwaila weyahina, ma 'i'etolemegita. 11 Gide Yehoba 'ina Bukiya 'ihepwaila, 'igwaeya,

“Ceguma taiyawedi sihemisa, nata geya'abwa siwe'awe'a.”
12 Ta geya 'eta wataha 'omi tomiya ganamuli ma tauma meYudiya gamwagamwanida, weyahina mabwaiyada tauna 'ida Bada, 'oinega 'eguma ta'ahwanoi 'oina, nata 'ihelau bwaibwainigita. 13 Weyahina 'eguma taiya Badaina 'oina 'i'ahwanoi, nata 'etolihasa 'iloba.

14 Moisa, tomota geya sowasowahina ma 'etolihasa weyahina si'ahwanoi 'oina, 'eguma geya sihemisae. Geya sihemisae weyahina geya Badaina sanina sihesagohe. Ma geya sihesagohe weyahina geya 'idi tologuguyamo. 15 Ta 'eguma Bada tologuguya 'ihewasaedi sitauya 'oidiya, nata Yesu wasana sihesagohe ma sihemisae, eema 'eguma saninega si'ahwanoi nata 'i'abihetedi, weyahina Yehoba 'ina Buki 'oina gide wete 'ihepwaila pwaiya, 'igwaeya,

“Tologuguyaowedi taudi tetela bwebwe'ana si'eweyama weyahidi tayaliyaya.”
16 Ma tupwadi geya sihemisa, weyahina Aiseya 'ihepwaila pwaiya weyahidi, 'igwaeya,

“Bada yo, 'ino gwaeina weyahina geya si'ahwa moisaegau.”
17 Eeta 'eguma Keliso weyahina taloguguya, nata hisahisadimo sihesagoha ma sihemisa. 18 Ma togidega meYudiyaedi 'ina gwaeina sihesagoheya, bo geya? Cehe sihesagoheya, ta Yehoba 'ina Buki 'oina 'ihepwaila pwaiya, 'igwaeya,

“Cidi loguguyaina 'asa mabwaiyadi sihesagoheya, weyahina gogo gabulena mabwaiyana 'oidiya 'i'edadana.”
19 Ta gwae bewama togidega weyahina meIsileli sinuwa sabwalena, bo geya? Cehe, sinuwa sabwalena, weyahina Yehoba mwalo Mosese 'oina 'ihepwaila 'igwaeya,

“Comi meIsileli nata 'igu paihowega hali tomota matahwadi wahe'ipi'ipiyedi, ma nata wete wagamwasowaledi weyahina 'abehega taudi geya 'igu bodao moisa.”
20 Ma Aiseya Yehoba 'ina gwaeina wete 'igwae waiwaiya, 'igwaeya,

“Tomotaiyedi taudi geya si'ebesegau, nuwana sihesilalegau, 'oidiya yalatuwa, ma ba'idagwao 'ahe'iya'iyaguwa.”
21 Ma 'ina gwae wete pa'alina meIsileli weyahidi 'igwaeya,

“Tuta mabwaiyana yabwaubwauwedi eema 'abehega sitauyama 'oiguwa, ma hesi si'ita'ita guipailegau, weyahina taudi tuwa mumugadi gide, toheguipaila.”